افسانے

ایک سو پینتیس روپے

19 May 2020
مصنف کا نام : نیاز محمود
کریڈٹ: صدف اقبال
مناظر: 347

سکینہ سمجھ دار عورت تھی۔ وہ سمجھ گئی کہ جمیل نے ایسا کیوں کیا۔ وہ چپ رہی۔ جمیل اپنی بے بسی پہ دل ہی دل میں رو رہا تھا۔ دو مہینے سے اوپر ہوگئے تھے اس کی مزدوری نہیں لگی تھی۔ وہ ریڑھی لگایا کرتا تھا لیکن لاک ڈاون کی وجہ سے سب کچھ بند تھا۔ لوگوں کا باہر نکلنا بند تھا۔ وہ بھی گھر سے نہیں نکل سکتا تھا۔

مصنف کا نام: نیاز محمود
کریڈٹ: 0

افسانہ : ایک سو پینتیس روپے

افسانہ نگار : نیاز محمود

niyazmahmood72@gmail

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آج تیسرا دن تھا ان کے گھر کچھ نہیں پکا تھا۔ پاس پڑوس سے تھوڑا بہت جو آیا وہ بچوں کو کھلایا۔ مسلسل کئی دنوں کی بھوک کی وجہ سے سکینہ کی رنگت اڑی اڑی سی تھی۔ رمضان نے بھرم تو رکھا تھا لیکن صرف چند گھونٹ پانی سے آخر اور کتنے دن رہا جا سکتا تھا۔ کوئی دس سال پہلے اس کے چچا زاد جمیل سے اس کی شادی طے پائی تھی۔ جمیل ایک خوبرو اور گبرو جوان تھا۔ وہ اس کا بہت خیال رکھتا تھا۔ وہ سارا دن محنت مزدوری کرتا اور شام کو آکر ساری کمائی سکینہ کے ہاتھ پہ رکھ دیتا۔ ان دس سالوں میں کبھی ایسا موقع نہیں آیا کہ جمیل نے سکینہ سے ترش لہجے میں بات تک کی ہو۔ لیکن آج جب سکینہ نے اس سے کہا کہ بچے بھوکے ہیں تو اس نے زندگی میں پہلی بار سکینہ سے اونچی زبان میں بات کی۔ اس کی اس طرح ترش لہجے میں بات کرنے سے سکینہ بھی سکتے میں آ گئی۔ سکینہ سمجھ دار عورت تھی۔ وہ سمجھ گئی کہ جمیل نے ایسا کیوں کیا۔ وہ چپ رہی۔ جمیل اپنی بے بسی پہ دل ہی دل میں رو رہا تھا۔ دو مہینے سے اوپر ہوگئے تھے اس کی مزدوری نہیں لگی تھی۔ وہ ریڑھی لگایا کرتا تھا لیکن لاک ڈاون کی وجہ سے سب کچھ بند تھا۔ لوگوں کا باہر نکلنا بند تھا۔ وہ بھی گھر سے نہیں نکل سکتا تھا۔ کچھ رقم جو پس انداز کی تھی وہ ختم ہوگئی تھی اور اب بات فاقوں تک آ پہنچی تھی۔کبھی کبھار پاس پڑوس سے کچھ نہ کچھ کھانے کو مل جاتا تھا لیکن اس سے گزارا ناممکن تھا۔ اس نے سوچا کیوں نہ باہر جا کر ایک کوشش کی جائے ہو سکتا ہے کچھ کام مل جائے اور وہ اس سے گھر کے لیے کچھ راشن خرید کر لا سکے۔ اس خیال سے وہ گھر سے نکلا اور سیدھا مارکیٹ کا رخ کیا۔ گلیاں اور سڑکیں سنسان تھیں وہ چلتا رہا اور پورا دن مختلف مارکیٹوں کی خاک چھانتا رہا۔ اذان ہوئی چند گھونٹ پانی پیا اور روزہ افطار کیا۔ اندھیرا چھا گیا تو خالی ہاتھ گھر لوٹا۔ وہ کافی دیر گھر کے دروازے کے سامنے ساکت کھڑا رہا۔ ایسا محسوس ہورہا تھا کہ اس میں جان ہی نہیں۔ وہ بت بنا فیصلہ نہیں کر پا رہا تھا کہ کیا کرے۔ کافی دیر بے سدھ کھڑے رہنے کے بعد اس کے ہاتھ اٹھے اور نہ چاہتے ہوئے گھر کا دروازہ کٹکٹایا۔ سکینہ نے اس کے لیے دروازہ کھولا تو اس کی بے چین نگاہیں تیر بن کر اس کے چہرے میں پیوست ہوگئیں۔ سکینہ کی ویران اور بھوکی آنکھیں اس سے ایک ہی سوال کر رہی تھیں جس کا جواب اس کے پاس نہ تھا۔ جمیل کی سکینہ سے آنکھیں ملانے کی ہمت نہیں ہو رہی تھی۔ اس کا اترا ہوا چہرہ اور خالی ہاتھ سکینہ کی امیدوں کے آگے بند باندھے کھڑے تھے۔ وہ دونوں یونہی ایک دوسرے سے بیگانے دروازے پر کچھ دیر کھڑے رہے۔ سکینہ نے ایک نظر جمیل کے چہرے پر ڈالی اور سامنے سے ہٹ کر اسے راستہ دیا۔ سکینہ نے اسے پانی پلایا اور کہا۔ بچے انتظار کرتے کرتے سو گئے ہیں۔ آپ بھی سو جائیے۔ جمیل نے اک نظر سکینہ کو دیکھا لیکن اس سے نظریں نہ ملا سکا۔ وہ رات جمیل نے آنکھوں میں کاٹی۔ اگلے روز وہ سویرے ہی گھر سے نکل پڑا۔ سکینہ اور بچوں پہ کیا بیتی اس کا اسے پتہ نہ چلا۔ مارکیٹ پہنچا تو اسے معلوم ہوا کہ لاک ڈاون میں نرمی کر دی گئی یے۔ اس کا چہرہ کھل اٹھا۔ اک آدھ دکانیں کھلی تھیں۔ ایک جاننے والے سے اسے کچھ رقم قرض ملی تو بچوں کے لیے کھانے کا انتظام کرکے گھر کا رخ کیا۔ بچے جو کئی دنوں سے بھوکے تھے ان کی عید ہوگئی۔ بچوں نے کھایا تو سکینہ اور جمیل نے بھی اک دو نوالے منہ میں ڈالے۔ رات جب بچے سو گئے تو سکینہ نے اسے مشورہ دیا کہ بقایا پیسوں سے وہ ریڑھی لگا دے تاکہ چولہا جلتا رہے۔ جمیل بھی یہی سوچ رہا تھا۔ صبح ہوتے ہی وہ ریڑھی نکال کر مارکیٹ گیا اور بچے کچے چند پیسوں سے مختلف سبزیاں خرید کر گلی گلی بیچنے لگا۔ ادھر سکینہ بچوں کو آس لگا کر چپ کرا رہی تھی جو اٹھ کر کھانے پینے کو کچھ مانگ رہے تھے۔ چھوٹا بیٹا بخار سے تپ رہا تھا۔ وہ اسے پٹیاں لگا کر بخار کم کرانے کی کوشش کر رہی تھی اور ساتھ ہی بچوں کو دلاسے بھی دے رہی تھی کہ پاپا گئے ہیں ابھی آتے ہی ہوں گے۔ ادھر جمیل دوپہر تک مختلف گلیوں کے چکر لگاتا رہا لیکن کسی نے اس سے کچھ نہیں خریدا۔ گلیاں اور سڑکیں اب بھی سنسان تھیں۔ اک آدھ آدمی اگر نظر آتا بھی تو ایک دوسرے سے انجان بن کر گزر جاتا۔ کرونا کا ڈر اور خوف انہیں قریب نہیں آنے دے رہا تھا۔ جمیل بڑی گلی سے ہوتا ہوا سڑک پر آیا۔ جہاں اسے امید تھی کہ اسے گاہک مل جائیں گے۔ سڑک پر آ کر وہ ایک مصروف جگہ پر کھڑا ہو گیا۔ اسے وہاں کھڑے ابھی چند ہی منٹ ہوئے تھے کہ لوگوں کا رش بن گیا۔ پانچ چھ آدمی اس کے گرد کھڑے ہو کر بھاو پوچھنے لگے۔ اس نے سوچا قیمت کم لگا دیتا ہوں تاکہ جلدی سب کچھ بکے اور وہ بیوی بچوں کے لیے خوراک کا بندوبست کر سکے۔ دو تین گاہک رخصت کرنے کے بعد اس نے آواز لگائی۔ "دو کی قیمت میں تین کلو" سب اس کی طرف متوجہ ہوئے۔ ابھی وہ ان کو نمٹا ہی رہا تھا کہ پولیس کی گاڑی آئی اور پکڑ دھکڑ شروع کی۔ جمیل کے پاس چونکہ گاہک زیادہ تھے لہذا ایک دو پولیس والے اس کی طرف لپکے۔ جمیل نے منت سماجت شروع کی۔ پولیس نے رش بنانے سے منع کیا لیکن جمیل تو مجبور تھا اسے اپنی اور اپنے بیوی بچوں کی فکر لا حق تھی۔ اس نے جلدی جلدی گاہک کو نمٹانا چاہا جس سے پولیس کو اشتعال ملا اور انہوں نے اسے سختی سے منع کیا لیکن جمیل نے سنی ان سنی کر دی۔ پولیس آگے بڑھی اور اس کی ریڑھی الٹ دی۔ ساری سبزیاں سڑک پر بکھر گئیں۔ رش تتر بتر ہوگیا۔ جمیل کو پولیس کے ہاتھوں مار بھی پڑی۔ وہ سر پکڑ کر بیٹھ گیا۔ وہ زور زور سے رونا چاہ رہا تھا لیکن آواز اس کے حلق میں اٹک گئی۔ اس نے سبزیاں سڑک پر چھوڑ کر اپنی ریڑھی سنبھالی اور گھر کی راہ لی۔ وہ اک دکان پر رکا۔ جیب میں ہاتھ ڈالا تو جیب سے ایک سو پینتیس روپے برآمد ہوئے۔ اس کی آنکھیں نم تھیں۔ وہ کچھ دیر سوچتا رہا اور پیسے واپس جیب میں ڈال کر چلتا بنا۔ اس نے گھر کا دروازہ کٹکٹایا۔ سکینہ نے دروازہ کھولا۔ بچے بابا آ گئے، بابا آ گئے، کہتے ہوئے آ کر ان سے لپٹ گئے۔ جمیل نے بچوں کو پیار کیا اور دو بھرے بھرے تیلے سکینہ کے حوالے کیے۔ سکینہ کی خوشی کی انتہا نہ رہی لیکن وہ کچھ عجیب محسوس کر رہی تھی۔ وہ جمیل کی آنکھوں میں کچھ ڈھونڈ رہی تھی۔ وہ آنکھوں ہی آنکھوں میں اس سے کچھ پوچھنا چاہ رہی تھی لیکن جمیل جو ایسے موقوں پر اکثر اس کی آنکھوں میں آنکھیں ڈال کر پلکوں کو ہلکی سی حرکت دیتا تھا، آج جان بوجھ کر اس سے نظریں نہیں ملا رہا تھا۔ سکینہ کچھ دیر کھڑی سوچتی رہی لیکن بچوں کی بے صبری دیکھتے ہوئے جلدی کچن کی طرف لپکی۔ اس دن سب نے خوب پیٹ بھر کر اپنا پسندیدہ کھانا کھایا اور بے فکر ہو کر سوگئے۔ صبح خبر مشہور ہوئی کہ محلے کی ایک زیر تعمیر مکان سے دن دیہاڑے چور پانی کی موٹر اور قیمتی سامان لے اڑے۔۔۔۔۔

افسانے

ایک سو پینتیس روپے

متعلقہ مضامین

افسانہ : تہ سنگ

ادھوری کہانیاں

فیصلٰہ

U may kiss the bride now

کمنٹ کریں